Сёння, 15 красавіка, апошні дзень прыёму заявак на ўдзел ў лінгвістычна-краязнаўчым адукацыйным праекце для беларускай моладзі "Карані і вершаліны". У новым відэасюжэце - усё, што варта ведаць пра гэты праект. Патрабаванні да патэнцыйных ўдзельнікаў выкладзеныя тут.

У 2012 годзе Еўрапейскі Саюз заставаўся найбуйнейшым у свеце донарам супрацоўніцтва для развіцця. Паводле дадзеных Арганізацыі эканамічнага супрацоўніцтва і развіцця, у 2011 годзе аб'ём дапамогі склаў 50,5 мільярда еўра. Найбольшыя сумы паступілі ад Вялікабрытаніі (10,6 мільярда еўра), Германіі (10,2 мільярда еўра), Францыі (9,3 мільярда еўра), Нідэрландаў (4,2 мільярда еўра) і Швецыі (4,1 мільярда еўра).

Камітэт Еўрапейскага парламента абмеркаваў праект правілаў аднаўлення візавага рэжыму з трэцімі краінамі. Камітэт па пытаннях грамадзянскіх свабод, юстыцыі і ўнутраных справаў Еўрапейскага парламента падтрымаў законапраект па ўнясенні зменаў у візавае заканадаўства. Ён прадугледжвае магчымасць аднаўлення візавага рэжыму для грамадзян трэціх краін, з якімі быў уведзены бязвізавы рэжым. У законапраекце называюцца дзве ўмовы: для грамадзян ЕС у трэцяй краіне захоўваюцца патрабаванні атрымліваць візы ці рэзка вырасла нерэгуляваная міграцыя з той краіны, у дачыненні да якой дзейнічае бязвізавы рэжым.Аднаўленне візавага рэжыму прадугледжанае законапраектам як скрайная мера, апошні з магчымых захадаў. Каб набыць сілу закона, праект павінен прайсці праз "звычайную" заканадаўчую працэдуру -- ухваленне Еўрапейскім парламентам і Саветам.

Інфляцыя ў еўразоне запаволілася да 1,7 %. Паводле папярэдніх падлікаў Еўрастата, па выніках сакавіка гадавая інфляцыя ў краінах зоны еўра склала 1,7 %. Па выніках лютага гэты паказнік складаў 1,8 %.

Еўрапейская Камісія апублікавала вынікі паглыбленых макраэканамічных аглядаў, праведзеных у 13 дзяржавах ЕС. Згодна з імі, дысбаланс у эканоміках Іспаніі ды Славеніі можа лічыцца празмерным. У Іспаніі вельмі высокія ўнутраны і знешні ўзроўні запазычанасці па-ранейшаму ўяўляюць сур'ёзную небяспеку для эканамічнага росту і фінансавай стабільнасці. У Славеніі рызыкі для стабільнасці вынікаюць з карпаратыўнай запазычанасці. Аналізам сітуацыі ў астатніх 11 дзяржавах (Бельгіі, Балгарыі, Венгрыі, Вялікабрытаніі, Даніі, Італіі, Мальце, Нідэрландах, Фінляндыі, Францыі і Швецыі) эксперты засталіся задаволеныя.

У Ірландыі найбольшая доля грамадзян з вышэйшай адукацыяй. Паводле інфармацыі Еўрастата, 51 % грамадзян Ірландыі ва ўзросце ад 30 да 34 гадоў мае закончаную вышэйшую адукацыю. Гэта найвышэйшы паказнік у ЕC. За Ірландыяй ідуць Кіпр (49,9 %) і Люксембург (49,6 %). Італія займае апошняе месца ў спісе – 21,7 % грамадзян краіны маюць вышэйшую адукацыю; у Румыніі гэты паказнік складае 21,8 %.

Еўрапейская Камісія правядзе антыманапольнае расследаванне ў дачыненні да MasterCard. Расследаванне, у прыватнасці, датычыць аперацый, якія замежнікі здзяйсняюць на тэрыторыі ЕС з дапамогай картак MasterCard. Еўрапейская Камісія правярае, ці можна назваць некаторыя з міжбанкаўскіх збораў антыканкурэнтнымі. Таксама будзе разглядацца пытанне пра тое, у якой ступені правілы, устаноўленыя MasterCard для фірмаў-акцэптантаў (яны абавязваюць фірмы прымаць усе віды карт MasterCard), могуць парушаць правілы канкурэнцыі ў еўразоне.

Агляд падрыхтаваны Цэнтрам еўрапейскіх даследаванняў для Прадстаўніцтва ЕС у Беларусі. За адбор матэрыялаў і змест агляду адказвае Цэнтр еўрапейскіх даследаванняў; агляд не можа лічыцца адлюстраваннем пазіцыі Еўрапейскага Саюза.

Прадстаўніцтва Еўрапейскага Саюза ў Беларусі
вул. Энгельса, 34А/2 220030 Мінск
Рэспубліка Беларусь
Тэлефон: +375 (17) 328 66 13
Факс: +375 (17) 2891281
Эл. пошта: delegation-belarus-press@eeas.europa.eu
http://eeas.europa.eu/delegations/belarus
Facebook

Delegation of the European Union to Belarus
34A/2 Engels Street Minsk 220030 Belarus
Telephone: 375 17 3286613
Fax: 375 17 2891281
E-mail: delegation-belarus-press@eeas.europa.eu
http://eeas.europa.eu/delegations/belarus
Facebook