#

Агляд падзей ЕС: 10-16 чэрвеня

Агляд падзей ЕС: 10-16 чэрвеня

16 чэрвеня – У Афінах адбудзецца цырымонія ўручэння прэміі EUROPA Nostra Еўрапейскага Саюза за захаванне і папулярызацыю культурнай спадчыны. Спіс пераможцаў уключае 30 праектаў.

17–18 чэрвеня – У Лох-Эрн (Паўночная Ірландыя) адбудзецца саміт Групы васьмі (G8) пад старшынствам Вялікабрытаніі. На парадку дня стаяць развіццё глабальнага гандлю як рухавіка росту сусветнай эканомікі, забеспячэнне выканання падатковага заканадаўства, а таксама спрыянне павышэнню празрыстасці ў дачыненні даходаў ад здабываючай прамысловасці, лясной гаспадаркі і кіравання зямельнымі рэсурсамі.

18 чэрвеня – Будзе апублікаваны даклад аб павышэнні якасці выкладання і навучання ва ўніверсітэтах Еўропы. 
18–20 чэрвеня – У Бруселі адбудзецца 12-я еўрапейская сустрэча людзей, якія жывуць у беднасці.

Прэс-сакратары Высокага прадстаўніка Кэтрын Эштан і Камісара Штэфана Фюле зрабілі ў пятніцу заяву з нагоды прыняцця Саветам па правах чалавека рэзалюцыі па правах чалавека ў Беларусі. "Мы вітаем учорашняе прыняцце Саветам па правах чалавека рэзалюцыі па Беларусі ўстойлівай большасцю галасоў сябраў Савета. Мы адзначаем, што падтрымка гэтай ініцыятывы расце і выказваем падзяку ўсім партнёрам, якія працавалі ў яе рамках з Еўрапейскім Саюзам.Мы таксама вітаем падаўжэнне мандату Спецыяльнага дакладчыка ААН па Беларусі спадара Міклаша Харашці, які будзе і надалей незалежна і ўзважана рабіць справаздачы і даваць рэкамендацыі беларускім уладам па сітуацыі з правамі чалавека ў краіне. Мы заклікаем беларускія ўлады да поўнага супрацоўніцтва з ім. Мы глыбока шкадуем, што на працягу тыдня, падчас якога была прынятая гэтая рэзалюцыя, якая прыцягвае ўвагу да існавання ў краіне смяротнага пакарання, яшчэ дзве асобы ў Беларусі былі асуджаныя на смяротнае пакаранне. Мы спадзяемся, што іх права на абскарджванне выраку будзе поўнасцю рэалізаванае. Мы прымаем да ўвагі аднаўленне парламенцкай працоўнай групы па праблеме смяротнага пакарання ў Беларусі. Мы заклікаем Беларусь, адзіную краіну ў Еўропе, якая ўсё яшчэ прымяняе смяротнае пакаранне, далучыцца да глабальнага мараторыя на смяротнае пакаранне ў якасці першага кроку да яго поўнага скасавання. Мы нагадваем, што развіццё двухбаковых адносінаў паміж ЕС і Беларуссю магчымае пры ўмове прагрэсу ў забеспячэнні Беларуссю прынцыпаў дэмакратыі, вяршэнства права і правоў чалавека. ЕС па-ранейшаму гатовы дапамагчы Беларусі выканаць свае абавязацельствы ў гэтай сферы," паведамляецца ў заяве.

Еўрапейскі Саюз выдзеліць Малдове 90 мільёнаў еўра на ажыццяўленне рэформаў 
Першае пагадненне на суму 60 мільёнаў еўра датычыць падтрымкі рэформаў у сферы юстыцыі Малдовы з мэтай стварэння даступнага, эфектыўнага, незалежнага, празрыстага і прафесійнага судовага сектара, які забяспечыў бы прынцып вяршэнства права, а таксама абарону правоў чалавека. Другое пагадненне – на суму 30 мільёнаў еўра – прадугледжвае падтрымку ў падрыхтоўцы, перамовах і рэалізацыі новых пагадненняў паміж Еўрапейскім Саюзам і Малдовай, у тым ліку пагаднення аб асацыяцыі і для ўдзелу Малдовы ў Еўрапейскай 7-й рамачнай праграме.

Швецыя першынствуе ў рэйтынгу раўнапраўя палоў 
Швецыя займае першае месца ў рэйтынгу раўнапраўя палоў сярод усіх краін ЕС. Пра гэта сведчаць звесткі, апублікаваныя на сайце Еўрапейскага інстытута гендарнай роўнасці. У аснове рэйтынгу ляжыць індэкс гендарнай роўнасці, які ўвабраў у сябе шэсць паказнікаў: праца, улада, веды, грошы, здароўе, час.

Швецыя набрала 74,3 бала з магчымых 100 балаў. Следам за ёй ідуць Данія (73,6) і Фінляндыя (73,4). Апошнія месцы рэйтынгу займаюць Балгарыя і Румынія, у іх 37,0 і 35,3 бала адпаведна.

Прэзентаваная сістэма ECall, якая дазволіць аўтамабілю звязацца з экстраннай службай дапамогі 
Еўрапейская Камісія прыняла прапанову для змякчэння наступстваў сур'ёзных дарожна-транспартных здарэнняў на ўсёй тэрыторыі Еўрапейскага Саюза. Згодна з ёй, да кастрычніка 2015 года ўсе новыя аўтамабілі будуць аўтаматычна тэлефанаваць у экстранныя службы ў выпадку сур'ёзнай аварыі. Сістэма ECall аўтаматычна набірае 112 – адзіны нумар экстраннай дапамогі ў Еўропе – у выпадку сур'ёзнай аварыі. Сістэма паведаміць службам экстраннай дапамогі пра месца знаходжання аўтамабіля, нават калі кіроўца страціў прытомнасць або не ў стане зрабіць тэлефонны званок. Лічыцца, што сістэма зможа выратаваць да 2500 жыццяў за год.

Цэны ў Грэцыі і Латвіі зніжаюцца 
Паводле падлікаў Еўрастата, гадавая інфляцыя ў зоне еўра ў маі 2013 года склала 1,4 % у параўнанні з 1,2 % у красавіку 2013 года. Самыя нізкія тэмпы інфляцыі ў маі 2013 года назіраліся ў Грэцыі і Латвіі, дзе цэны ўпалі на 0,3 % і на 0,2 % адпаведна, а самыя высокія – у Румыніі (рост на 4,4 %) і Эстоніі (рост на 3,6 %).

Еўрапейскі Саюз і фонд Біла і Мелінды Гейтс будуць разам змагацца з хваробамі беднасці 
Бакі дамовіліся разам спрыяць стварэнню новых медыкаментаў і вакцын ды распрацоўцы шляхоў іх найхутчэйшай перадачы хворым на ВІЧ/СНІД, сухоты, малярыю ды іншыя хваробы, звязаныя з беднасцю. Ужо ў 2014 годзе будзе заснаваны сумесны прыз, які будзе ўручацца за інавацыі ў вырашэнні глабальных праблем у сферы аховы здароўя. Задача партнёрства заключаецца ў распрацоўцы за год хаця б аднаго новага і больш эфектыўнага прэпарата для лячэння хвароб, звязаных з беднасцю.

Дапушчальныя ўзроўні электрамагнітнага выпраменьвання будуць змененыя 
Еўрапейскі Парламент прыняў рашэнне ўзмацніць патрабаванні да абароны работнікаў ад электрамагнітнага выпраменьвання. У прыватнасці, прадугледжваецца ўсталяванне новага гранічна дапушчальнага ўзроўню выпраменьвання ў адпаведнасці з рэкамендацыямі Міжнароднага камітэта па абароне ад неіянізаванага выпраменьвання. Змены ў заканадаўстве мае афіцыйна зацвердзіць Савет Еўрапейскага Саюза.

Еўрапейскі Парламент выступае за ўзмацненне барацьбы з мафіяй 
Пра гэта ідзе гаворка ва ўхваленай незаканадаўчай рэзалюцыі. У дакуменце дэпутаты, у прыватнасці, адзначылі важнасць узмацнення праграм абароны сведак, а таксама асоб, якія раскрываюць інфармацыю пра злачынствы мафіі. Акрамя таго, Еўрапейскі Парламент выказаўся за адмену банкаўскай таямніцы, каб пазбавіць злачынныя арганізацыі іх фінансавых рэсурсаў. На думку дэпутатаў, банкі, страхавыя кампаніі ды крэдытныя інстытуты мусяць супрацоўнічаць з праваахоўнымі органамі. Дэпутаты таксама выказаліся за тое, каб любы чалавек, асуджаны за такія злачынствы, як гандаль людзьмі, эксплуатацыя дзіцячай працоўнай сілы або адмыванне грошай, не мог браць удзелу ў тэндарных працэдурах Еўрапейскага Саюза як мінімум на працягу пяці гадоў. Паводле ацэнак Еўрапейскай Камісіі, даход ад злачыннай дзейнасці складае 3,6% сусветнага ВУП, а страты ад карупцыі ў ЕС складаюць каля 1% ВУП ЕС.

Агляд падрыхтаваны Цэнтрам еўрапейскіх даследаванняў для Прадстаўніцтва ЕС у Беларусі. За адбор матэрыялаў і змест агляду адказвае Цэнтр еўрапейскіх даследаванняў; агляд не можа лічыцца адлюстраваннем пазіцыі Еўрапейскага Саюза.

Прадстаўніцтва Еўрапейскага Саюза ў Беларусі
вул. Энгельса, 34А/2 220030 Мінск
Рэспубліка Беларусь
Тэлефон: +375 (17) 328 66 13
Факс: +375 (17) 2891281
Эл. пошта: delegation-belarus-press@eeas.europa.eu
http://eeas.europa.eu/delegations/belarus
Facebook

Delegation of the European Union to Belarus
34A/2 Engels Street Minsk 220030 Belarus
Telephone: 375 17 3286613
Fax: 375 17 2891281
E-mail: delegation-belarus-press@eeas.europa.eu
http://eeas.europa.eu/delegations/belarus
Facebook

Европейский конвент – Процесс, приведший к разработке европейской конституции, был инициирован в декабре 2000 г. благодаря Декларации ...